Përfundon dëshminë dëshmitari i 105-të në rastin Thaçi dhe të tjerët – Albnews

Gjatë ditës së sotme është mbajtur seanca e rradhës ndaj ish-krerëve të Ushtrisë Çlirimtare të Kosovës.

Në këtë seancë dëshmoi dëshmitari me kodin 00344. Ky dëshmitar ishte i 105-ti me radhë dhe dëshmoi me masa mbrojtëse e po ashtu edhe përmes video-lidhjes, raporton “Betimi për Drejtësi”.

Ndonëse përfundimi i dëshmisë së tij nuk është bërë e ditur gjatë seancës, për një gjë të tillë ka informuar DhSK-ja përmes një njoftimi për media.

E gjithë dëshmia e këtij dëshmitari është dëgjuar në sesion privat për publikun dhe si e tillë përfundoi edhe seanca e sotme për të vazhduar të enjten sipas orarit të zakonshëm.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit. 

Më 29 prill 2022, Zyra e Prokurorit  të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020././