Dëshmia e djalit për vrasjen e Martinit, kryekomisari i Policisë jep detaje nga dëshmia

“Nuk shfaqi pendesë”, kryekomisari zbulon detaje nga dëshmia e 14-vjeçarit që vrau Martinin: Dy familjet janë në konflikt të hapur

TIRANË – Kryekomisari Asllan Shytaj, Shefi i Sigurisë Publike në Drejtorinë e Policisë së Tiranës, i ftuar në Top Story ka dhënë detaje të reja në lidhje me të miturin që qëlloi me thikë Martin Canin, i cili fatkeqësisht humbi jetën.

Shytaj ka treguar se autori ndodhet në spital pasi është plagosur, detaj të cilin e konfirmon edhe profesori i kriminalistikës Ervin Karamuço, i cili tha se “ka pasur vetëm dorën të fashuar.”

14-vjeçari M.P., është marrë sot në pyetje, dhe nga dëshmia e tij kryekomisari tregon se nuk ka shfaqur pendesë, ndërsa deklaron se dy familjet nga Veriu janë në konflikt të hapur.

“Nuk kemi qenë prezent, por vazhdon të jetë i acaruar, jo i penduar. Konflikti do jetë i hapur mes dy familjeve. Janë dy familje me origjinë nga veriu. Atje ekzistojnë akoma këto të gjakmarrjes”, tha Shytaj.

Më herët sot është zbardhur dëshmia e 14-vjeçarit M.P., i cili akuzohet se ka vrarë me thikë bashkëmoshatarin e tij, Martin Canin.

Në dëshmi, 14-vjeçari ka deklaruar se sherri ka nisur “sepse po më shikonte”.